ULIMWENGU AENDA KUKAMILISHA MCHONGO KUKIPIGA LIGI YA SWEDEN

MSHAMBULIAJI wa kimataifa wa Tanzania, Thomas Ulimwengu, anaondoka nchini leo kuelekea nchini Sweeden kwaajili ya kukamilisha usajili wake  katika klabu ya Ligi Kuu ya nchini humo, AFC Eskilstuna.

Katika mahojiano na mwandishi wa habari hizi, Ulimwengu amesema kuwa mazungumzo yamekamilika na sasa anakwenda kusaini mkataba wa miaka miwili na klabu hiyo.

“Napenda kutoa shukrani zangu za dhati kwa watu wote waliofanikisha suala hili, kama Jamal Kisongo ambao wamekuwa karibu na mimi kwa kipindi chote hiki na kunipa ushauri hadi kufikia maamuzi haya ya kujiunga na timu hii.  Tumekataa ofa nyingi sana na kuikubali hii kwa sababu za msingi sana,”alisema.

Ulimwengu alisema kwamba anashukuru Mungu ndoto zake za kucheza Ligi Kuu Ulaya zinatimia na ataitumia AFC Eskilstuna kama daraja la kupandia timu kubwa barani humo.

“Kila kitu ni malengo tu, inategemea na mtu unataka kitu gani katika wakati gani, nakwenda AFC Eskilstuna kucheza mpira kama nilivyocheza TP Mazembe ili nionekane nisogee mbele zaidi,”alisema.

Ulimwengu menye umri wa miaka 23 aliibukia katika taasisi ya soka Tanzania (TSA) mwaka 2008, kabla ya mwaka 2009 kwenda kuanza kukomazwa Ligi Kuu katika klabu ya Moro United alikokuwa akicheza kwa mkopo hadi mwaka 2010 alipokwenda akademi ya Athletic FC ya Sweden, alikocheza hadi 2011 TP Mazembe alipochukuliwa na timu ya vijana ya Mazembe.

Alicheza U-20 ya Mazembe kwa msimu moja kabla ya kupandishwa rasmi timu ya wakubwa mwaka 2012 na moja kwa moja kuwa mchezaji wa kikosi cha kwanza hadi anamaliza Mkataba wake Oktoba mwaka jana.

Ulimwengu anajivunia kushinda mataji makubwa akiwa na Mazembe kama Ligi ya Mabingwa Afrika, Super Cup ya Afrika na pamoja na kucheza Klabu Bingwa ya Dunia. Habari kwa hisani ya Bin Zubeiry